ОРАЛ. ҚазАқпарат - Кеше Орал мен Павлодар қалаларында волейболдан ерлердің ұлттық лига командалары арасында ел чемпионаты төртінші кіші турының ойындары мәреге жетті.
Оралда «А» тобындағы командалар арасында өткен бәсекеде «Атырау» үздік өнер көрсетті. Олар «Конденсат-Жайықмұнай», «ТНК «)азхром», «Есіл» (Петропавл) командаларының үшеуін де ұтып, тоғыз ұпайға ие болды. Алаң иелерімен «Есілді» жеңген хромтаулықтар алты ұпайды еншіледі. Өз алаңында жігерсіз ойнаған оралдықтар тек көш соңындағы петропавлдықтарды ғана ұтып, небәрі үш ұпайға қол жеткізді.
Павлодарда«Б» тобы командалары арасында өткен кіші турда чемпиондықтан басты үміткер «Тараз» өскемендіктерді ұтқанымен, алаң иелері мен «Алматыдан» жеңіліп қалды. Сөйтіп тараздықтар бұл турда чемпион атана алмады. Дегенмен оларға Таразда 20 наурызда басталатын соңғы, төртінші үлкен турда небәрі бір ойында қарсыласын тізе бүктірсе, жетіп жатыр. «Павлодар» командасы бұрынғыша екінші орында келе жатса, осы турдан кейін ұпай санын 41-ге жеткізген «Атырау» үшінші сатыға көтерілді. Барлық жүлдегерлер Тараздағы қорытынды турда белгілі болмақ.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).