АСТАНА. ҚазАқпарат - Павлодар қаласында волейболдан ерлердің ұлттық лига командалары арасында ел біріншілігінің соңғы, төртінші турының ойындары өтуде.
Қазақстанның волейбол федерациясының сайтынан алынған мәліметке қарағанда, 21 наурыз күні «Тараз» командасы көш соңында келе жатқан Петропавлдың «Есілін» 3:0 есебімен ұтып, ұпай санын 67-ге жеткізді.
Сөйтіп белгілі беларусьтік маман Виктор Бекша жаттықтыратын тараздықтар қалған ойындардың нәтижесіне қарамастан, айды аспанға шығарып, өз тарихында тұңғыш рет ел чемпионы атанып отыр.
Екінші орында келе жатқан павлодарлықтар өз алаңында аяқ астынан Оралдың «Конденсат-Жайықмұнайынан» 1:3 есебімен жеңіліп қалды. Сондай-ақ қола жүлдеден басты үміткер «Атырау» Өскеменнің «ШығысҚорғасынҚұрылысына» 1:3 есебімен есе жіберсе, хромтаулықтар өткен жылғы ел чемпионы «Алматы» командасын 3:2 есебімен тізе бүктірді.
Айта кетейік, енді командалардың әрқайсысы үш ойыннан өткізеді. Чемпионат 25 наурыз күні мәреге жетіп, барлық жүлдегерлер анықталады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).