ОРАЛ. KAZINFORM – Орал қаласындағы «Жайық арена» спорт кешенінде волейболдан ерлердің ұлттық лига командалары арасында Қазақстан чемпионаты 3-үлкен турының ойындары өтіп жатыр.
Дүйсенбі күні біріншілікте көш бастап келе жатқан «Жетісу» командасы «Есілмен» (СҚО) кездесті.
Марат Адрышев жаттықтыратын талдықорғандықтар өткен жылы 29 қарашада ел чемпионы Оралдың «Жайығына» 1:3 есебімен есе жібергеннен кейін жеңіліссіз келе жатқан еді.
«Жетісу» солтүстікқазақстандықтарды 3:0 (25:19, 25:19, 25:16) есебімен қиналмай жеңді. Сөйтіп жеңіс сериясын алты матчқа жеткізді. Сондай-ақ «Ақтөбе» клубы «Таразды» 3:1 (25:18, 25:15, 27:29, 27:25) есебімен тізе бүктірді.
Атыраулықтар «Буревестниктен» (Алматы) басым түсті – 3:0 (25:17, 25:21, 25:21). Алаң иелері «Жайық» клубы «Ұшқын-Көкшетаудан» айласын асырды – 3:0 (25:16, 25:16, 25:19).
«Жетісу» 50 ұпаймен жеке-дара көш бастаса, «Ақтөбе» (43 ұпай) екінші, «Атырау» (41) үшінші, «Жайық» (38) төртінші орында келеді.
Бәсекелер 11 ақпан, сәрсенбі күні жалғасады.
Еске сала кетейік, бұдан бұрын волейболдан «Жетісу» ерлер командасының суперкубок иегері атанғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).