АСТАНА. KAZINFORM — Филиппинде волейболдан Азия чемпиондар лигасында «Жетісу» командасы екінші кездесуін жеңіспен аяқтады.
Талдықорғандықтар «А» тобында иорданиялық «Al Nasser» командасымен шеберлік байқасты.
Бұл жолы сербиялық маман Марко Гршич негізгі құрамда аздаған өзгеріс жасап, Кристина Аниконова мен «Қуаныштан» (СҚО) қосылған украиналық Юлия Дымарды алаңға бірден шығарды.
Қазақстандық волейболшылар аса қинала қойған жоқ. Үшінші сетте Перизат Нұрбергенова, Ирина Кенжебаевалар да ойынға қосылды.
«Жетісу» 3:0 (25:10, 25:15, 25:11) есебімен қарсыласын ойсырата ұтып, өз тобынан бірінші орынмен ширек финалға өтті.
Талдықорғандық команданың ширек финалдағы қарсыласы кейін анықталады.
Еске сала кетейік, бұдан бұрын «Жетісудың» волейболдан Азия чемпиондар лигасын жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).