АСТАНА. KAZINFORM — Қытайдың Цзянмэнь қаласында волейболдан 21 жасқа дейінгілер арасында ХХІІІ әлем чемпионатында Қазақстан құрамасы үшінші кездесуін өткізді.
Бұл жолы Сергей Трикоз жаттықтыратын қазақстандықтар В тобында Пуэрто-Рико командасына тап келді.
Қос құрама да бастапқы екі ойынында ұтылып қалған еді. Сондықтан олар жеңіс үшін барын салды.
Тартысты өрбіген бірінші партияны қазақстандықтар өз есебіне жазды — 25:23. Екіншісінде 25:21 есебі тіркелді. Үшінші сетте қазақстандық жастар қарқынын үдетті — 25:16. Қорытынды есеп — 3:0.
Осылайша, әлем чемпионатына өз тарихында бірінші рет қатысып жатқан Қазақстан жастар құрамасы алғашқы жеңісіне қол жеткізді.
Сергей Трикоздың шәкірттері 25 тамыз күні Польша құрамасымен ойнайды.
Еске сала кетейік, бұдан бұрын волейболдан әлем чемпионатында Қазақстан жастар құрамасының алғашқы ұпайына қол жеткізгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).