АСТАНА. KAZINFORM — Үндістанның Ахмедабад қаласында волейболдан ерлер командалары арасында өтіп жатқан Азия кубогында Қазақстан құрамасы Бахрейнмен сынға түсті.
Бұл кездесудің А тобындағы қос команда үшін де маңызы зор еді.
Аталмыш топта алаң иелері 12 ұпаймен жеке-дара көш бастап келеді. Бахрейн 6 ұпаймен екінші орында болса, Қазақстан (5 ұпай) үшінші сатыда еді. Сондықтан жеңген құрама жартылай финалға бір табан жақындай түседі.
Сергей Трикоздың шәкірттері матчты сәтті бастады — 25:22. Алайда бұдан кейін бахрейндіктер күш алып кетті — 25:23, 25:17, 25:20. Қорытынды есеп — 3:1, Бахрейннің пайдасында.
Қазақстан құрамасы өз тобындағы соңғы ойынын 26 маусым күні Жаңа Зеландиямен өткізеді.
Еске сала кетейік, бұдан бұрын волейболдан Азия кубогында Қазақстан құрамасының Аустралияны камбэкпен жеңгенін жазған едік.
Волейболдан Азия кубогында Қазақстан құрамасы тағы бір команданы камбэкпен ұтты.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).