АСТАНА. KAZINFORM — Филиппиннің Кандон қаласында волейболдан әйелдер командалары арасында Азия кубогының ойындары жалғасын тапты.
B тобында Қазақстан құрамасы Индонезиямен екінші кездесуін өткізді.
Кешегі құрамда ойнаған қыздарға қоса бүгін Жанна Сыроежкина, Айгүл Мүлкібаевалар алаңға шықты.
Асқар Шалқыбековтің шәкірттері индонезиялық волейболшыларды 3:0 (25:19, 25:19, 25:19) есебімен тізе бүктірді.
В тобында Вьетнам мен Қазақстан құрамалары 6 ұпаймен көш бастап келеді. 8 маусым күні қазақстандықтар Иранмен бәсекеге түседі.
Еске сала кетейік, бұдан бұрын волейболдан Азия кубогында Қазақстан құрамасының Гонконгтан басым түскенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).