ПЕТРОПАВЛ. KAZINFORM – Петропавл қаласында волейболдан әйелдердің Ұлттық лига командалары арасында ХХХІІ Қазақстан чемпионатының төртінші турында Өскеменнің «Берелі» мен «Алматы» командалары кездесті.
Турнир кестесінде үздік үштікте тұрған «Берелді» Ришат Гилязутдинов жаттықтырса, «Алматының» бапкері оның ағасы Рафаэль Гилязутдинов еді.
Үш партияда да Ришаттың шәкірттері басымдылық тізгінін уысынан шығарған жоқ – 3:0 (25:17, 25:17, 25:16).
Осы ойыннан кейін 50 ұпай жинаған өскемендіктер «Жетісу» командасымен екінші-үшінші орынды бөлісіп тұр. «Қуаныш» (СҚО) бұрынғыша көш бастаса, 49 ұпайы бар «Тұран» (Түркістан) төртінші, «Алматы» (43 ұпай) бесінші орында келеді.
Бүгін сондай-ақ «Жетісу» Павлодардың «Ертісін» 3:0 (25:18, 25:14, 25:13), «Қарағанды» Өскеменнің «Алтайын» 3:0 (25:22, 25:17, 25:22) есебімен ұтты.
Еске сала кетейік, бұдан бұрын волейболдан Қазақстан чемпионатында «Тұранның» «Жетісу» командасынан айласын асырғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).