АҚТӨБЕ. KAZINFORM — Талдықорғанның «Жетісу» клубы волейболдан ерлердің ұлттық лига командалары арасында ХХХIV Қазақстан чемпионаты бірінші турының қорытындысы бойынша көш бастады.
Марат Адрышев жаттықтыратын талдықорғандықтар маңызды екі кездесуін сәтті өткізді.
Кеше «Жетісу» командасы осыған дейін көш бастап келе жатқан биылғы күміс жүлдегер «Ақтөбені» (бас бапкері Сергей Трикоз) аса тартысты матчта тізе бүктірді. Бірінші сетте волейболда сирек кездесетін 40:38 есебі тіркелді. Содан кейін талдықорғандықтар дес берген жоқ – 25:22, 25:14. Қорытынды есеп – 3:0. Бұл алаң иелерінің жаңа маусымдағы алғашқы жеңілісі еді.
Бүгін «Жетісу» клубы Қазақстан чемпионы, Виктор Козик баптайтын Оралдың «Жайығын» 3:0 (25:17, 25:18, 25:18) есебімен жеңді. Осылайша, 18 ұпай жинаған талдықорғандықтар ел біріншілігінде жеке-дара көш бастады.
Еске сала кетейік, бұдан бұрын «Жетісу» командасының «Қуанышты» жеңіп, көш басына шыққанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).