АСТАНА. KAZINFORM – Павлодар қаласында әйелдердің Ұлттық лига командалары арасында ХХХІІ Қазақстан чемпионаты үшінші турының ойындары жалғасып жатыр.
Бұл жолы орталық ойын өскемендік «Берел» мен түркістандық «Тұран» арасында өтті.
Осының алдында солтүстікқазақстандық «Қуаныштан» ұтылған өскемендіктер «Тұранға» 1:3 (21:25, 19:25, 27:25, 21:25) есебімен есе жіберді. «Алматы» «Алтайды» 3:0 (25:12, 25:21, 25:17) есебімен оңай жеңсе, «Жетісу» тағы бір талдықорғандық клуб – «Айқаракөзден» басым түсті – 3:0 (25:12, 25:9, 25:14).
«Қарағандыны» 3:0 (25:13, 25:14, 25:11) есебімен тізе бүктірген «Қуаныш» 41 ұпаймен көш бастап келеді. «Берел» 37 ұпаймен екінші орында. Алайда 34 ұпай жинаған «Алматы», «Жетісу» және «Тұран» командалары «Берелге» жақындап қалды.
Еске сала кетейік, бұдан бұрын волейболдан Қазақстан чемпионатында «Қуаныштың» көш басына қайта көтерілгенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).