ПАВЛОДАР. KAZINFORM — Павлодар қаласында волейболдан ерлердің ұлттық лига командалары арасында өтіп жатқан XXXIII Қазақстан чемпионатының екінші турында «Жетісу» (Талдықорған) мен «Ақтөбе» кездесті.
Қоржынында 24 ұпайы бар талдықорғандықтар осы ойында ұтса, онда турнир кестесінде бірінші орынға көтерілер еді. Өйткені көш басындағы Оралдың «Жайығы» (25 ұпай) бүгінгі бәсекелерге қатыспайды.
Дүйсенбі күні оралдықтарға 0:3 есебімен жол берген ақтөбеліктерге де ұпай ауадай қажет еді.
Бірінші партияда «Жетісу» 25:21 есебімен басым түскенімен, бұдан кейін ақтөбеліктер күш алып кетті – 25:23, 25:21, 25:21. Қорытынды есеп – 3:1.
Осылайша, 20 ұпай жинаған ақтөбеліктер қайтадан үшінші орынға шықты.
Еске сала кетейік, бұдан бұрын волейболдан ел чемпионы «Тараздың» атыраулықтардан жеңіліп қалғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).