ӨСКЕМЕН. KAZINFORM – Волейболдан әйелдердің ұлттық лига командалары арасында Өскемен қаласында өтіп жатқан XXXIII Қазақстан чемпионатының бірінші турында «Жетісу» (Талдықорған) мен «Қарағанды» клубтары өзара кездесті.
Осыған дейін қарағандылық команда қатарынан бес рет жеңіске жетсе, талдықорғандықтар тартысты матчта тек өскемендік «Берелге» есе жіберген еді.
Бұл жолы «Жетісу» (бас бапкері Марко Гршич) Нұрлан Садықов жаттықтыратын «Қарағандыны» еркін ұтты – 3:0 (25:17, 25:13, 25:14).
Осы жеңістен кейін 16 ұпай жинаған талдықорғандықтар көш басына көтерілді. Бірақ бүгін «Берел» Түркістанның «Тұранын» ұтса, онда өскемендік клуб бірінші орынға шығады.
«Алматы» - «Грация KZ» матчында бірінші партия барынша тартысты өрбіді. Дегенмен тәжірибесі басым алматылықтар ойын тізгінін өз қолына ала білді – 3:0 (25:20, 25:18, 25:14).
Еске сала кетейік, бұдан бұрын волейболдан Қазақстан чемпионатында «Қарағандының» қатарынан бесінші жеңісіне қол жеткізгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).