Бұл күні Қазақстанның жастар құрамасы («Қазақстан-2») үшінші рет жеңіліс тапты. Ал Қытайдың Бейжің қаласының «BAIC Motor» командасы күтпеген жерден бахрейндіктерге 1:3 (23-25, 25-27, 25-21, 21-25) есебімен есе жіберді. Ал «Қазақстан-1» ұлттық құрамасы таиландтықтарды 3:0 (25-22, 25-18, 25-13) есебімен ойсырата ұтты. Бұған дейін қытайлықтар «Қазақстан-2» (3:0) мен «Қазақстан-1» (3:1) құрамаларын, таиландтықтар «Тунис» (3:0) пен «Қазақстан-2» (3:1) командаларын жеңген еді. Ал тунистіктер таиландтықтарға (0:3) жеңілгенімен бахрейндіктерді (3:1) ұтса, «Қазақстан-1» құрамасы бахрейндіктерді (3:0) жеңгенімен, қытайлықтардан (1:3) жеңіліс тапқан болатын. Бүгін барлық командалар бір күн тынығып, ертең «Бахрейн» мен «Қазақстан-2», «BAIC Motor» мен «Таиланд», «Қазақстан-1» мен «Тунис», ал арғы күні «Таиланд» пен «Бахрейн», «Тунис» пен «BAIC Motor», «Қазақстан-2» мен «Қазақстан-1» ақтық кездесулерін өткізеді. Қазір турнир кестесінде бірдей 6 ұпай жинағанымен, ойналған партиялар қатынасы бойынша қазақстандықтар («Қазақстан-1») бірінші, қытайлықтар екінші, тунистіктер үшінші, таиландтықтар төртінші, 3 ұпаймен бахрейндіктер бесінші, ал қоржынында әлі бірде-бір ұпайы жоқ Қазақстанның жастар құрамасы алтыншы орында келе жатыр.
14:34, 01 Қыркүйек 2012
Волейболдан ерлер командалары арасындағы ҚР Президенті кубогында «Қазақстан-1» құрамасы көш бастап келе жатыр
АЛМАТЫ. 1 қыркүйек. ҚазАқпарат - Волейболдан Алматыдағы Балуан Шолақ атындағы спорт сарайында өтіп жатқан «ҚР Президенті кубогы» ХІХ Халықаралық турнирінде кеше жеңіліссіз келе жатқан қытайлықтар мен таиландтықтар да жеңілістің ащы дәмін татты.