АСТАНА. KAZINFORM — Астана қаласындағы «Барыс арена» стадионында волейболдан әйелдердің ұлттық лига командалары арасында Қазақстан чемпионатының финалында «Жетісу» (Талдықорған) мен «Қуаныш» (СҚО) клубтары кездесті.
Сербиялық маман Марко Гршич жаттықтыратын талдықорғандық команда өз тарихында тоғыз дүркін ел чемпионы атанса, солтүстіқазақстандықтар (қазіргі бапкері Юрий Панченко) қола жүлдеден аспаған еді.
Бұл жолы бес партияға созылған матчта «Жетісу» жеңіске жетті - 3:2 (25:22, 19:25, 12:25, 25:22, 15:12).
Ертең командалар екінші финалдық кездесуін өткізеді. Онда талдықорғандықтар ұтса, чемпион атанады.
Қола жүлде үшін бірінші бәсекеде «Тұран» (Тұркістан) Өскеменнің «Берелінен» басым түсті – 3:2 (23:25, 26:24, 19:25, 25:17, 15:9).
Ал 5-8 орындар үшін таласта қарағандылықтар «Астананы» қапы қалдырды – 3:0 (25:19, 25:21, 25:15). «Алматы» ақтөбеліктерден айласын асырды - 3:0 (25:17, 25:18, 25:15).
Еске сала кетейік, бұдан бұрын волейболдан Қазақстан чемпионатында «Жетісу» мен «Қуаныш» клубы алтын жүлдеге таласатынын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).