Волейболдан Қазақстан чемпионаты: алтын үшін айқаста "Тараз" таразы басын теңестірді

ПАВЛОДАР. KAZINFORM - Павлодар қаласында волейболдан ерлердің Ұлттық лига командалары арасында Қазақстан чемпионы ертең анықталады.

Бүгін өткен жылғы ел чемпионы "Павлодар" мен "Тараз" клубтары финалда екінші кездесуін өткізді.

Кеше Игорь Никольченко жаттықтыратын павлодарлықтар "Таразды" ұтқандықтан, оларға бір жеңіс жеткілікті еді. 

Алайда Андрей Патраковтың шәкірттері бүгін тың серпінмен алғашқы екі партияны алды - 25:23, 25:17. Бұдан кейін алаң иелері есепті қысқартты - 25:22. 

Төртінші партияда тараздықтар 9:5 есебімен алға кетті. Павлодарлықтар таразы басын теңестіре алды - 14:14. Бірақ "Тараздың" қарқынын тежей алмады - 23:25. Сеттер саны бойынша есеп: 3:1, "Тараздың" пайдасында.

Жалпы есеп тең - 1:1.

Қазақстан чемпионы ертең қосымша, үшінші матчта анықталады. 

Еске сала кетейік, бұдан бұрын "Есіл" командасының волейболдан Қазақстан чемпионатының қола жүлдегері атанғанын жазған болатынбыз.