ОРАЛ. KAZINFORM — Орал қаласындағы «Жайық арена» спорт кешенінде волейболдан ерлердің ұлттық лига командалары арасында Қазақстан чемпионатының топтық бәсекесінде «Атырау» мен «Есіл» алаңға шықты.
Бұл Б тобындағы алғашқы кездесу еді.
Ислам Жұмабеков жаттықтыратын атыраулықтар ойын тізгінін бірден қолына алып, матч аяқталғанша сол қарқынынан танған жоқ – 3:0 (25:22, 25:15, 25:18).
Осылайша, өткен жылы төртінші орынға табан тіреген атыраулықтар биыл да жүлдеге таласудан үмітті екендіктерін байқатты.
«Атырау» ертең «Буревестник» (Алматы) клубымен ойнайды. Бұл топтан жартылай финалға жолдама алған команда «Жайықпен» (Орал) кездеседі.
А тобында сейсенбі күні «Жетісу» (Талдықорған) – «Павлодар» өзара сынға түседі.
Еске сала кетейік, бұдан бұрын волейболдан ел чемпионатында «Павлодар» клубының плей-офф кезеңін жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).