ОРАЛ. KAZINFORM – Орал қаласында волейболдан ерлердің Ұлттық лига командалары арасында ХХХІІ Қазақстан чемпионаты үшінші турының ойындары аяқталды.
Бұл турда Игорь Никольченко жаттықтыратын ел чемпионы – «Павлодар» клубы қарсыластарының бәрінен басым түсті.
Соңғы матчта павлодарлықтар «Буревестник» (Алматы) командасын 3:0 (25:21, 25:23, 25:18) есебімен тізе бүктіріп, ұпай санын 49-ға жеткізді.
Павлодардан 10 ұпайға қалып қойған «Тараз» «Атырауды» жеңді – 3:0 (25:15, 25:19, 25:16).
Үздік үштікті түйіндеген (38 ұпай) Оралдың «Жайығы» «Жетісу жастарын» қапы қалдырды – 3:0 (25:21, 25:13, 25:12).
Жетінші орындағы «Ақтөбе» көш соңында келе жатқан «Ұшқын-Көкшетаудан» ұтылып қалды – 0:3 (20:25, 21:25, 23:25).
Төртінші тур 8-18 ақпанда Ақтөбе қаласында өтіп, содан кейін плей-офф бәсекесіне шыққан үздік сегіз команда анықталады. Плей-офф ойындары Павлодарда өтеді.
Еске сала кетейік, бұдан бұрын волейболдан Қазақстан чемпионатында «Жайықтың» алматылық «Буревестникті» жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).