ТҮРКІСТАН. KAZINFORM — Түркістан қаласында әйелдердің Ұлттық лига командалары арасында ХХХІІ Қазақстан чемпионатының жартылай финалында алаң иелері – «Тұран» екінші ойында «Қуаныш» (СҚО) командасынан басым түсті.
Өткен жылғы күміс жүлдегер – «Қуаныш» (бас бапкері – Азамат Есімов) осыған дейін ел біріншілігінде қатарынан он матчта жеңіске жетіп, оған қоса плей-офф кезеңінде «Алтайды» және жартылай финалдың бірінші бәсекесінде «Тұранды» ұтқан еді.
Бұл жолы Асқар Шалқыбеков жаттықтыратын түркістандық қыздар 3:0 (25:19, 31:29, 25:22) есебімен «Қуанышты» тізе бүктірді.
Осылайша, жартылай финалда есеп теңесті – 1:1. Сенбі күні шешуші ойында финалға шыққан команда анықталады.
Еске сала кетейік, бұдан бұрын волейболдан ел чемпионатында «Жетісу» «Берелмен» матчта қарымта қайырғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).