ОРАЛ. KAZINFORM – Оралда волейболдан ерлердің Ұлттық лига командалары арасында ХХХІІ Қазақстан чемпионаты үшінші турының ойындары мәреге жақындап келеді.
Турнир кестесінде 46 ұпаймен бұрынғыша, ел чемпионы – «Павлодар» командасы көш бастап тұр.
Игорь Никольченконың шәкірттері тартысты ойында «Есіл» (СҚО) командасын 3:2 (20:25, 25:23, 18:25, 25:16, 17:15) есебімен тізе бүктірді. Солтүстікқазақстандықтар 29 ұпаймен үздік төрттікті түйіндеп отыр.
Екінші орындағы «Тараз» «Ұшқын-Көкшетаудан» 3:1 (25:20, 21:25, 25:22, 25:16) есебімен басым түсті.
Тараздықтардың қоржынында 36 ұпай бар. Одан бір ұпайы кем «Жайық» «Буревестникті» (Алматы) 3:0 (25:23, 25:19, 25:16) есебімен қапы қалдырды.
«Атырау» «Жетісу жастарын» 3:0 (25:21, 25:22, 25:18) есебімен жеңді.
19 қаңтар күні үшінші турдың соңғы ойындары өтеді. Онда «Ақтөбе» - «Ұшқын-Көкшетау», «Буревестник» - «Павлодар», «Тараз» - «Атырау», «Жетісу жастары» - «Жайық» командалары өзара кездеседі.
Еске сала кетейік, бұдан бұрын волейболдан Қазақстан чемпионатында «Жайықтың» «Есілден» басым түскенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).