АТЫРАУ. KAZINFORM – Атырау қаласында волейболдан ерлердің ұлттық лига командалары арасында ХХХІІІ Қазақстан чемпионаты бірінші турының екінші күнін «Ақтөбе» және «Жайық» (Орал) клубтары бастады.
Алғашқы ойында ақтөбеліктер ел біріншілігінің күміс жүлдегері «Павлодарды» ұтса, оралдықтар «Жетісу» (Талдықорған) командасынан жеңіліп қалған еді.
Батыс дербиі тартысты өрбіп, екі сағаттан астам уақытқа созылған матчта ақтөбеліктер 3:2 (25:18, 23:25, 25:22, 19:25, 15:13) есебімен басым түсті.
Осылайша, ақтөбеліктер екі ойын қатарынан жеңіске жетсе, оралдықтар үшін чемпионат сәтсіз басталды.
Бұл – бірінші турда бес сетке созылған екінші кездесу. Кеше «Буревестник» (Алматы) «Есілді» (СҚО) 3:2 (17:25, 25:22, 23:25, 25:19, 15:11) есебімен қапы қалдырған еді.
Бірінші тур одан әрі жалғасуда.
Еске сала кетейік, бұдан бұрын волейболдан Қазақстан чемпионатында «Ақтөбенің» «Павлодарды» ұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).