АСТАНА. KAZINFORM – Павлодар қаласында әйелдердің Ұлттық лига командалары арасында ХХХІІ Қазақстан чемпионатының үшінші турында алғашқы бес клуб құйрық тістесіп келеді.
Турнир кестесінде 41 ұпаймен көш бастаған «Қуаныш» (СҚО) сенбі күнгі ойындарға қатысқан жоқ.
Осыған дейін қатарынан екі рет ұтылған өскемендік «Берел» Павлодардың «Ертісін» 3:1 (23:25, 25:14, 25:16, 25:22) есебімен тізе бүктіріп, 40 ұпаймен «Қуанышқа» жақындай түсті.
Бірақ солтүстікқазақстандық клубтың бір ойыны кем.
«Алматы», «Жетісу» (Талдықорған) және «Тұран» (Түркістан) командаларының қоржынында 37 ұпайдан бар.
Алматылықтар «Қарағандыны» 3:1 (15:25, 26:24, 25:21, 25:19) есебімен қапы қалдырса, талдықорғандықтар Өскеменнің «Алтайын» оңай жеңді – 3:0 (25:22, 25:8, 25:15).
Түркістандықтар «Айқаракөзден» (Талдықорған) айласын асырды – 3:0 (25:17, 25:7, 25:11).
Алтыншы орындағы «Ертістің» небәрі 18 ұпайы бар.
Жексенбі күні орталық матч «Алматы» мен «Қуаныш» арасында өтеді.
Еске сала кетейік, бұдан бұрын волейболдан ел чемпионатында «Берел» клубының қатарынан екінші рет жеңіліп қалғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).