АСТАНА. KAZINFORM – Астанадағы Жақсылық Үшкемпіров атындағы жекпе-жек сарайында волейболдан ерлер командалары арасында Қазақстан кубогының жартылай финалдық матчтары аса тартысты өтті.
Бірінші жартылай финалда «Атырау» мен биылғы ел чемпионы «Жайық» (Орал) командалары кездесті.
Атыраулықтар бірінші және екінші сетте 28:26, 25:18 есебімен басымдылық танытты. Бұдан кейін оралдықтар таразы басын теңестірді – 25:19, 25:23. Бесінші, шешуші партия соңында атыраулықтар 14:12 есебімен алда тұрғанымен, оралдықтар қуып жетті. Алайда шешуші ұпай «Атыраудың» еншісінде кетті – 16:14. Қорытынды есеп - 3:2, Игорь Никольченко шәкірттерінің пайдасында.
Екінші ойын да бес партияда аяқталды. Мұнда «Жетісу» өткен жылғы кубок иегері «Ақтөбені» 3:2 (25:22, 22:25, 25:21, 18:25, 16:14) есебімен қапы қалдырды.
Осылайша, Қазақстан кубогын «Атырау» мен «Жетісу» (бас бапкері Марат Адрышев) сарапқа салады.
Еске сала кетейік, бұдан бұрын «Жетісудың» әлемдегі үздік бес клубтың қатарына кіргенін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).