МАНИЛА. KAZINFORM - Филиппин астанасы Манила қаласында волейболдан әйелдер командалары арасында өтіп жатқан «AVC шақыру кубогі» турнирінде Қазақстан құрамасы финалға жолдама алды.
Қазақстандық қыздар жартылай финалда алаң иелері – Филиппин командасымен сынға түсті.
Қазақстан құрамасы қарсыласын 3:0 (25:23, 25:21, 25:14) есебімен ұтты.
Екінші жартылай финалда Вьетнам командасы Аустралияны 3:0 (25:21, 25:19, 25:16) жолдан тайдырды.
Осылайша, Қазақстан мен Вьетнам соңғы бәсекеде «Сегіздік финалына» берілетін жалғыз жолдаманы сарапқа салады. Топтық бәсекеде қазақстандықтар Вьетнам қыздарына 1:3 есебімен есе жіберген еді. Енді Ришат Гилязутдинов шәкірттерінің қарымта қайтаратындай мүмкіндігі бар.
Еске сала кетейік, бұдан бұрын волейболдан Қазақстан құрамасы Филиппиндегі турнирдің жартылай финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).