АСТАНА. KAZINFORM – Тәжікстан астанасы Душанбе қаласында 16 жасқа дейінгі ойыншылар арасында Орталық Азия волейбол қауымдастығының (CAVA - Central Asian Volleyball Association) чемпионаты аяқталды.
Қазақстан волейбол федерациясынан мәлім еткеніндей, 2010-2011 жылғы қазақстандық жасөспірімдер бес кездесудің бәрінде жеңіске жетті.
Қазақстан қыздар құрамасы финалда Өзбекстанды 3:0 (25:17, 25:18, 25:14) есебімен айқын басымдылықпен тізе бүктірді.
Турнирдің үздік ойыншылары қатарында құрама капитаны Асылы Әбітай, Маргарита Вагнер және Ульяна Кокинаның (№24) есімдері аталды.
Денис Исаевтың шәкірттері қараша айының басында Иорданияда өтетін Азия чемпионатында бақ сынайды.
Бұдан екі жыл бұрын Ринат Ерғазин баптаған 2008-2009 жылғы қыздар да Орталық Азияда үздік атанған еді.
Еске сала кетейік, бұдан бұрын волейболдан Ұлттар кубогында Қазақстанның маңызды кездесуде Иранды қапы қалдырғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).