ПЕТРОПАВЛ. KAZINFORM – Петропавл қаласында волейболдан әйелдердің Ұлттық лига командалары арасында ХХХІІ ҚР чемпионаты төртінші турының ойындары өтіп жатыр.
Бұл жолы орталық матч «Жетісу» (Талдықорған) мен «Берел» (ШҚО) командалары арасында өтті.
Кеше «Жетісу» бесінші сатыдағы «Алматыны» жеңсе, «Берел» «Алтайдан» айласын асырған еді.
Сербиялық маман Марко Гршич жаттықтыратын «Жетісу» командасы бүгін де ширақ әрі шебер қимылдап, «Берелді» 3:0 (25:21, 28:26, 25:23) есебімен ұтты.
Осылайша, 46 ұпай жинаған «Жетісу» турнир кестесінде өскемендіктерді қуып жетіп, доп айырмасы бойынша үшінші орынға көтерілді.
Қарағандының «Ертісін» 3:0 (25:15, 25:17, 25:22) есебімен қапы қалдырған Түркістанның «Тұраны» 47 ұпаймен екінші сатыда тұр.
Солтүстікқазақстандық «Қуаныш» өз алаңында көш тізгінін ешкімге бере қоймас.
Еске сала кетейік, бұдан бұрын волейболдан Қазақстан чемпионатында «Қуаныштың» «Тұранды» ұтқанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).