АСТАНА. KAZINFORM — Вьетнам астанасы Ханой қаласында волейболдан әйелдер құрамалары арасында өтіп жатқан құрлықтық AVC Ұлттар кубогы жарысында Қазақстан командасы Моңғолиямен шеберлік байқасты.
Бірінші партияда Ришат Гилязутдиновтің шәкірттері дес берген жоқ – 25:14. Алайда екінші сетте күтпеген жерден есе жіберді – 24:26. Ал үшіншісінде қарымта қайырды – 25:18.
Төртінші сетте Моңғолия құрамасы 9:4 есебімен алға шыққанымен, қазақстандық қыздар таразы басын теңестіріп қана қоймай, матчты жеңіспен түйіндеді – 25:15. Жалпы есеп – 3:1.
Команда капитаны, Орал волейболының түлегі Сана Анарқұлова нәтижелі ойын өрнегін көрсете білді. Сондай-ақ Юлия Якимова, Маргарита Бельченко, Перизат Нұрбергенова, байланыстырушы Наиля Нигматуллина, Сәния Балағазинова, Татьяна Никитиналарды атап өтуге болады. Либеролар Сәбира Бекішева, Томирис Сағымбаева алма-кезек алаңға шығып отырды.
Осылайша, қатарынан екі жеңіске қол жеткізген Қазақстан құрамасы В тобында көш бастады.
Ертең қазақстандықтар Индонезия командасымен алаңға шығады.
Еске сала кетейік, бұдан бұрын Қазақстан әйелдер құрамасының волейболдан Ұлттар кубогын жеңіспен бастағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).