АСТАНА. KAZINFORM — Вьетнам астанасы Ханой қаласында волейболдан әйелдер құрамалары арасында өтіп жатқан AVC Ұлттар кубогында Қазақстан жеңісті жолын жалғастырды.
Қазақстан құрамасы бүгін В тобында Индонезия командасымен алаңға шықты.
Бас бапкер Ришат Гилязутдинов Моңғолиямен өткен ойында өнер көрсеткен волейболшыларға сенім артты.
Алғашқы екі партияда Қазақстан құрамасы (капитаны Сана Анарқұлова) айқын басымдылық көрсетті – 25:17, 25:12.
Үшінші партия барысында индонезиялықтар таразы басын теңестіргенімен, қазақстандықтар матчты сәтті түйіндей білді – 26:24. Жалпы есеп – 3:0.
Осылайша, қатарынан үш бәсекеде жеңіске жеткен Қазақстан өз тобында көш бастап келеді.
Р.Гилязутдиновтің шәкірттері 11 маусымда Иранмен шеберлік байқасады. 12 маусымда топтағы шешуші кездесуін Филиппин құрамасымен өткізеді.
Еске сала кетейік, бұдан бұрын волейболдан Ұлттар кубогында Қазақстанның екінші жеңісіне қол жеткізгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).