АСТАНА. KAZINFORM – Вьетнам астанасы Ханой қаласында волейболдан әйелдер құрамалары арасында өтіп жатқан AVC Ұлттар кубогында Қазақстан өз тобындағы соңғы кездесуін өткізді.
Ришат Гилязутдинов жаттықтыратын қазақстандықтар Филиппин құрамасымен В тобындағы бірінші орын үшін сынға түсті.
Осыған дейін Қазақстан 12, Филиппин 10 ұпай жинаған еді. Сондықтан қазақстандықтарға өз тобында көш басында қалуы үшін 2:3 есебімен жеңілсе де, жеткілікті еді. Алайда нағыз сын сәтте филиппиндіктер күш алып кетіп, дес бермеді – 3:0 (25:21, 25:15, 25:19). Бұған Иранмен өткен ойында Қазақстан құрамасының капитаны Сана Анарқұлованың жарақат алып қалуы да әсер еткендей.
Осылайша, В тобынан жартылай финалға Филиппин 13 ұпаймен бірінші, Қазақстан екінші орынмен жолдама алды.
Қазақстан жартылай финалда жарыс фавориті – Вьетнаммен ойнайды. Өткен жылы финалда қазақстандықтар дәл осы құрамадан ұтылған еді.
Еске сала кетейік, бұдан бұрын волейболдан Ұлттар кубогында Қазақстан маңызды кездесуде Иранды қапы қалдырғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).