АСТАНА. KAZINFORM — Бразилияда өтіп жатқан бокстан World Boxing аясында әлем кубогының бірінші кезеңіндегі екінші жарыс күнінде Даниял Сапарбай (90 келіден жоғары) жартылай финалға шықты.
Қазақстандық боксшы ширек финалда үндістандық Нарендер Нарендерді қапы қалдырды.
Жекпе-жек тартысты өтті. Нәтижесінде Даниял қарсыласын 3:2 есебімен тізе бүктірді.
Айта кетсек, бүгін қазірге дейін ел құрамасынан Талғат Сырымбетов (60 келі) бразилиялық Луис Оливейраға, Анита Адишева (54 келі) польшалық Виктория Рогалинскаяға есе жіберді.
Енді Нұрзат Оңғаров (50 келі) өзбекстандық Асылбек Жалилов, Алмат Әбдуали (65 келі) бразилиялық Юри Рейспен қолғап түйістіреді.
Сондай-ақ әлем кубогында еліміздің атынан ерлер құрамасында олардан басқа Дархан Дүйсебай (70 келі), Диас Молжігітов (80 келі), Дәулет Төлемісов (85 келі) сайысқа түседі.
Әйелдер құрамасынан Анитадан өзге Жазира Орақбаева (51 келі) мен Ұлжан Сәрсенбек (57 келі) бар.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.