World Boxing: Қазақстандық алты боксшы жартылай финалға шықты

АСТАНА. KAZINFORM - Бразилияда өтіп жатқан World Boxing аясындағы әлем кубогының бірінші кезеңінде 2 сәуірде қазақстандық төрт боксшы сынға түсті.

Ел құрамасынан Нұрсұлтан Алтынбек (55 келі) франциялық Билял Биналиді 5:0 есебімен тізе бүктіріп, жартылай финалға өтті. Алдағы қарсыласы - Маниш Ратори (Үндістан).

Сондай-ақ ел құрамасынан Диас Молжігітов (75 келі) польшалық Никоден Козактан 5:0 есебімен басым түсті.

Енді ол жартылай финалда өзбекстандық Жавохир Умматалиевпен кездеседі.

Ал Жазира Орақбаева (51 келі) бразилиялық Каролина Алмеиданы 3:2 есебімен тізе бүктірдіі.

Ел құрамасынан Дархан Дүйсебай (70 келі) франциялық Макан Траориге жол берді. Есеп 1:4.

Енді 3 сәуірден 4-іне қараған түні cағат 2:00-де Даниял Сапарбай 90 келіден жоғары) ақтық сын жолдамасына таласады. Оның қарсыласы - өзбекстандық Жахонгир Зокиров.

Сондай-ақ 4 сәуірде жартылай финалда Нұрсұлтан Алтынбек (55 келі), Жазира Орақбаева (51 келі), Ұлжан Сәрсенбек (57 келі), Диас Молжігітов (75 келі) пен Дәулет Төлемісов (85 келі) сайысқа түседі.

Қазірге дейін ел құрамасынан Нұрзат Оңғаров (50 келі), Талғат Сырымбетов (60 келі), Анита Әдішева (54 келі), Алмат Әбдуали (65 келі) жарыс жолынан шығып қалды.