XIII Ұлттық Дельфий ойындарында СҚО командасы бірінші орынды жеңіп алды
Ұлттық Дельфий комитеті директорының ақпараты бойынша, Халықаралық Дельфий комитетінің ҚР өкілі Құралай Түсіпбекованың сөзінше, солтүстікқазақстандықтар осы жолы 9 алтын, 11 күміс, 6 қола медаль жеңіп алды.
«Бұл ойындарға Қазақстанның барлық аймақтарынан 600-ге жуық жас дарындар қатысты. Облыс әкімінің орынбасары Мадияр Қожахмет басқарған ұйымдастыру штабының ерен еңбегінің арқасында ойындар өте жоғары деңгейде өтті. Бірінші орынды Солтүстік Қазақстан облысының командасы жеңіп алды. Екінші орынға 4 алтын, 5 күміс, 2 қола медальмен Астана командасының өрендері лайықты деп табылды. Үшінші орынға 3 алтын, 1 күміс, 2 қола медаль алған Ақмола облысының өнерпаздары табан тіреді»,-деді Құралай Түсіпбекова.
Оның сөзінше, алтын медаль иегерлері ұлттық дельфий құрамасына алынып, олар Халықаралық Дельфий ойындарында Қазақстан атынан өнер көрсетеді.
«ТМД аймағында ойындар әдетте сәуір- мамыр айлары аралығында өтеді. Сонымен қатар байқау аясында ТМД көлеміндегі тағы бірқатар дельфий кездесулері өтеді»,-деді Құралай Түсіпбекова.