АСТАНА. ҚазАқпарат – Қазақстандық, әлемнің 51-ракеткасы Юлия Путинцева Хобарт (Аустралия) WTA 250 турнирінің жартылай финалына шыға алмады, деп хабарлайды ҚазАқпарат тілшісі.
Қазақстандық теннисші ширек финалда әлемнің 72-ракеткасы, ресейлік Анна Блинковамен шеберлік байқасты.
А.Блинкова бірінші партияда 6:3 есебімен басым түсті. Екіншісінде де ол бірден брейк жасап, алға кетті. Ю.Путинцева таразы басын теңестіргенімен, есеп 4:4 болған мезетте ресейлік теннисші тағы бір брейк жасап, матчты аяқтай білді – 6:4.
Бір сағат 45 минутқа созылған бәсеке барысында Путинцева 2 эйс жасап, 11 брейк-пойнттың екеуін ғана пайдалана алды. Блинкова 4 эйс, 4 брейкпен (8 брейк-пойнт) көзге түсті.
Юлия Путинцева енді 16 қаңтарда басталатын Аустралия ашық чемпионатында бақ сынайды.
Еске сала кетейік, бұдан бұрын Елена Рыбакинаның жұптық сында Аделаида турнирінің финалына шыққанын жазған болатынбыз.
Сондай-ақ қазақстандық теннисшілердің Аустралия ашық чемпионатындағы қарсыластары анықталды.
Фото: Қазақстан теннис федерациясы
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).