НҰР-СҰЛТАН. ҚазАқпарат – Әлемнің 38-ракеткасы, қазақстандық Юлия Путинцева Цинциннати (АҚШ) WTA 1000 турнирінің екінші айналымына шыға алмады, деп хабарлайды ҚазАқпарат тілшісі.
Қазақстандық теннисші алғашқы айналымда әлемнің 24-ракеткасы, америкалық Мэдисон Кизбен шеберлік байқасты.
Бірінші партияда америкалық спортшы 7:5 есебімен басым түсті. Ол екінші сетте де есесін жібермеді – 6:3.
Бір сағат 23 минутқа созылған кездесуде Киз 6 эйс жасап, 4 брейк-пойнттың үшеуін пайдалана білді. Ю. Путинцева эйс те, брейк те жасай алған жоқ.
М. Киз екінші айналымда әлемнің 15-ракеткасы, латвиялық Елена Остапенкомен кездеседі. Ол осының алдында Торонто жарысының финалына дейін жеткен бразилиялық Беатрис Хаддад Майяны тізе бүктірді – 6:4, 6:4.
Қазақстанның бірінші ракеткасы Елена Рыбакина екінші айналым кезінде рейтингіде көш бастаған испаниялық Гарбинье Мугурусамен кортқа шығады.
Еске сала кетейік, бұдан бұрын қазақстандық жасөспірімдердің әлемдік рейтингіде жеке рекордтарына қол жеткізгенін, Даниил Медведевтің Astana Open ATP 500 турнирінің бірінші ракеткасы екендігін жазған болатынбыз.
Фото: www.sports.kz
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).