АСТАНА. ҚазАқпарат - Қазақстандық Юлия Путинцева Жапонияның Осака қаласында өтіп жатқан WTA 250 турнирінде жұптық сында ширек финалға өтті, деп хабарлайды ҚазАқпарат тілшісі.
Қазақстандық теннисші ресейлік Анна Калинскаямен бірге бастапқы кездесуін жапониялықтар Юки Наито - Моюка Учижимамен сәтті өткізді.
Бірінші партияда жапониялық жұп 6:2 есебімен басым түсті. Екіншісінде Путинцева мен Калинская есе қайырды - 6:3.
Содан кейін супер тай-брейкте жеңісті жұлып алды - 12:10.
Сағат жарымға жуық уақытқа созылған матчта қазақстандық-ресейлік дуэт 1 эйспен бірге 4 брейк-пойнттың тең жартысын пайдалана білді. Жапониялықтар 2 эйс, 3 брейкпен (8 брейк-пойнт) көзге түсті.
Осылайша, Юлия Путинцева бір күнде екі бәсеке өткізіп, жұптық сында да ширек финалға шықты.
Еске сала кетейік, бұдан бұрын Юлия Путинцеваның Осака турнирінің ширек финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).