АСТАНА. ҚазАқпарат – Қазақстанның екінші, әлемнің 56-ракеткасы Юлия Путинцева Бастад (Швеция) челленджер турнирінің финалына шыға алмады, деп хабарлайды ҚазАқпарат тілшісі.
Жарыстың 2-ракеткасы болып тіркелген қазақстандық теннисші жартылай финалда рейтингте 94-орында тұрған сербиялық Ольга Даниловичпен шеберлік байқасты.
Бірінші партия 6:4 есебімен сербиялық теннисшінің еншісіне жазылса, екіншісінде Ю.Путинцева бет қаратпады – 6:0. Алайда сол қарқынын үшінші, шешуші сетте жалғастыра алмай, жеңіліп қалды – 2:6.
Екі сағаттан астам уақытқа созылған тартысты матчта Юлия 11 брейк-пойнттың бесеуін пайдаланды. Қарсыласы 3 эйс, 5 брейкпен (6 брейк-пойнт) көзге түсті.
О.Данилович финалда әлемнің 55-інші, доданың 1-ракеткасы, америкалық Эмма Наварромен кездеседі. Ол жартылай финалда отандасы, рейтингте 251-сатыдағы Луиза Чирикодан айласын асырды – 6:4, 6:4.
Еске сала кетейік, бұдан бұрын Уимблдонда Елена Рыбакинаны жеңген Онс Жабердің финалға шыққанын жазған болатынбыз.
Сондай-ақ 16 жасар теннисші Қазақстан спартакиадасының чемпионы атанды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).