АСТАНА. ҚазАқпарат – Қазақстанның екінші, әлемнің 44-ракеткасы Юлия Путинцева Хуахин (Таиланд) WTA турнирінің екінші айналымына шыға алмады, деп хабарлайды ҚазАқпарат тілшісі.
Осы жарыстың екінші ракеткасы болып тіркелген қазақстандық теннисші алғашқы айналымда дүниежүзілік рейтингте 160-орында тұрған ұлыбританиялық Хитер Уотсонмен кездесті.
Бірінші партияда қазақстандық теннисші 7:5 есебімен басым түсті. Екіншісінде ұлыбританиялық спортшы есе қайырды – 6:4.
Үшінші, шешуші сетте Х.Уотсон есеп 5:3 болған мезетте матчқа доп бергенімен, сол мүмкіндігін пайдалана алмады. Бірақ тай-брейкте жеңісті жұлып алды – 7:6 (7:5).
Үш сағатқа созылған тартысты бәсеке барысында Ю.Путинцева 1 эйс жасап, 8 брейк-пойнттың жетеуін пайдаланды. Қарсыласы 4 эйс, 7 брейкпен (14 брейк-пойнт) көзге түсті.
Жүлде қоры 259 мыңнан астам АҚШ долларына бағаланған дода 5 ақпанда мәреге жетеді.
Еске сала кетейік, бұдан бұрын Аустралия чемпионатында Елена Рыбакинаның эйс жасаудан рекорд орнатқанын жазған болатынбыз.
Фото: ktf.kz
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).