НҰР-СҰЛТАН. ҚазАқпарат - Қазақстандық Юлия Путинцева Торонто WTA-1000 турнирінің екінші айналымына шықты, деп хабарлайды ҚазАқпарат тілшісі.
Қазақстандық теннисші алғашқы айналымда дүниежүзілік рейтингте 299-орында тұрған канадалық Кэтрин Себовпен шеберлік байқасты.
Бірінші партияда корт иесі басымдылық көрсетті - 6:3.
Екінші сетте Юлия Путинцева есе қайырды - 6:2. Ол үшінші, шешуші партияны брейкпен тәмамдады - 7:5.
Екі сағаттан астам уақытқа созылған матчта Путинцева 13 брейк-пойнттың бесеуін пайдалана білді.
Қазақстандық теннисші екінші айналымда әлемнің 3-ракеткасы, испаниялық Паула Бадосамен кездеседі.
Қазақстанның ерлер арасындағы бірінші ракеткасы Александр Бублик Монреаль мастерс жарысының беташар ойынында америкалық Дженсон Бруксбиден ұтылып қалды - 2:6, 3:6.
Еске сала кетейік, бұдан бұрын Елена Рыбакинаның Торонто турнирін жеңіспен бастағанын жазған болатынбыз.
Фото: ktf.kz
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).