АСТАНА. KAZINFORM — Қазақстанның екінші, әлемнің 55-ракеткасы Юлия Путинцева АҚШ ашық чемпионатының екінші айналымына шықты.
Қазақстандық теннисші бастапқы кездесуін дүниежүзілік рейтингіде 85-орында тұрған италиялық Элизабетта Кочареттомен өткізді.
Бірінші партияда италиялық спортшы 4:1 есебімен алға кеткенімен, Путинцева камбэк жасап, қатарынан бес геймді алды — 6:4.
Екінші сетте тай-брейкті Юлия сәтті аяқтай білді — 7:6 (7:4).
Осылайша, қазақстандық теннисші бұған дейін алты матчқа созылған жеңілістер сериясын тоқтатты.
Бір сағат 56 минутқа созылған бәсекеде Путинцева 10 брейк-пойнттың тең жартысын мүлт жіберген жоқ. Кочаретто 3 эйс, 4 брейкпен (8 брейк-пойнт) көзге түсті.
Юлия Путинцева үшінші айналымға шығу үшін әлемнің 29-ракеткасы, ресейлік Анна Калинская немесе рейтингіде 178-сатыдағы америкалық Клерви Нгунуэнің қай жеңгенімен таласады.
Еске сала кетейік, бұдан бұрын Анна Данилинаның АҚШ-тағы турнирдің чемпионы атанғанын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).