АСТАНА. KAZINFORM - Қазақстандық, әлемнің 64-ракеткасы Юлия Путинцева Аустралия ашық чемпионатының алғашқы айналымынан аса алмады.
Қазақстандық теннисші бастапқы кездесуін дүниежүзілік рейтингіде 190-орында тұрған ресейлік, 21 жастағы Анастасия Захаровамен өткізді.
Юлия Путинцева матчты сәтті бастады - 6:2.
Алайда екінші сетте бірде-бір гейм ала алмады - 0:6.
Үшінші, шешуші партияда есеп 4:3 болған мезетте А.Захарова брейк жасап кетті - 6:3.
Ресейлік теннисші екінші айналымда рейтингіде 109-сатыдағы словениялық Кая Юванмен кездеседі. Ол әлемнің 29-ракеткасы, тағы бір ресейлік Анастасия Потапованы қапы қалдырды - 6:1, 6:4.
Осылайша, Аустралия ашық чемпионатында әйелдер арасында жекелей сында Қазақстаннан Елена Рыбакина ғана қалды.
Еске сала кетейік, бұдан бұрын Александр Бубликтің әлемдік рейтингіде ТОП-25-ке жақындағанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).