Қазақстанның екінші, әлемнің 73-ракеткасы Юлия Путинцева Бейжің (Қытай) WTA 1000 турнирінің іріктеу сайысын сәтті бастады, деп хабарлайды ҚазАқпарат тілшісі.
Қазақстандық теннисші дүниежүзілік рейтингте 91-орында тұрған ұлыбританиялық Джоди Беррейджпен шеберлік байқасты.
Ю.Путинцева 1 сағат 42 минутқа созылған матчта 6:3, 6:3 есебімен жеңіске жетті. Ол 1 эйспен бірге 13 брейк-пойнттың бесеуін мүлт жіберген жоқ. Қарсыласы 2 эйс, 2 брейкпен (6 брейк-пойнт) көзге түсті.
Юлия Путинцева іріктеу сайыстарының финалында әлемнің 68-ракеткасы, ресейлік Элина Аванесянмен шеберлік таластырады. Оны жеңсе, негізгі жарысқа жолдама алады.
Қазақстанның бірінші, әлемнің 5-ракеткасы Елена Рыбакина да осы ірі додаға қатысу үшін дайындалуда.
Еске сала кетейік, бұдан бұрын Александр Недовесовтің Астана турнирінің ширек финалына шыққанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).