АСТАНА. KAZINFORM — Қазақстанның екінші, әлемнің 79-ракеткасы Юлия Путинцева Индиан-Уэллс (АҚШ) WTA 1000 турнирінің ширек финалына шыға алмады.
Қазақстандық теннисші төртінші айналымда әлемнің 1-ракеткасы, Польша өкілі Ига Швентекке қарсы келді.
Осыған дейін екі кездесуде де Ига басым түскен еді.
Бұл жолы бірінші партияда И.Швентек айқын басымдылық көрсетті – 6:1. Ол екінші партияда да сол қарқынынан танған жоқ – 6:2.
Бір сағат 10 минутқа созылған бәсеке барысында Ю.Путинцева 6 брейк-пойнттың екеуін пайдаланды. Поляк қызы 1 эйс, 6 брейкпен (14 брейк-пойнт) көзге түсті.
Ига Швентек жартылай финалға шығу үшін әлемнің бұрынғы 1-ракеткасы, қазір 204-орында тұрған даниялық Каролина Возняцкимен таласады. К.Возняцки төртінші айналымда кезінде рейтингіде көш бастаған германиялық Анжелика Керберді жолдан тайдырды – 6:4, 6:2.
Еске сала кетейік, бұдан бұрын Юлия Путинцеваның Индиан-Уэллсте әлемнің 1-ракеткасымен ойнайтынын жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).