АСТАНА. KAZINFORM — Қазақстанның екінші, әлемнің 81-ракеткасы Юлия Путинцева Монтеррей (Мексика) WTA 500 турнирі іріктеу сайысының финалына шықты.
Іріктеу сайысының 5-ракеткасы болып тіркелген қазақстандық теннисші алғашқы кездесуін рейтингіде 431-орындағы мексикалық Виктория Родригеспен өткізді.
Матч 6:4, 6:3 есебімен Ю.Путинцеваның пайдасына шешілді.
Бір сағат 25 минутқа созылған бәсекеде Путинцева 3 эйспен бірге 8 брейк-пойнттың тең жартысын пайдаға асырды. Родригес 1 эйс, 2 брейкпен (5 брейк-пойнт) шектелді.
Юлия Путинцева іріктеу сайысының финалында әлемнің 67-ракеткасы, аустралиялық, 20 жастағы Майя Джойнтпен шеберлік байқасады. Оны жеңсе, 23-29 тамыз аралығында өтетін негізгі жарысқа жолдама алады.
Еске сала кетейік, бұдан бұрын теннисші Григорий Ломакиннің Тайбэйдегі турнирдің финалына шыққанын жазған едік.
Сондай-ақ Алматыда Roland Garros Junior Series турнирі бойынша іріктеу жарысының жеңімпаздары анықталды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).