АСТАНА. KAZINFORM - Қазақстанның екінші, әлемнің 29-ракеткасы Юлия Путинцева 29 желтоқсан – 5 қаңтар аралығында өтетін Брисбен (Аустралия) WTA 500 турнирінде бақ сынайды.
Бұл қазақстандық теннисшінің жаңа маусымдағы алғашқы жарысы болмақ.
Аталмыш доданың 15-ракеткасы болып тіркелген Ю.Путинцева турнирді екінші айналымнан бастайды. Ол әлемнің 38-ракеткасы, Польша өкілі Магда Линетт немесе рейтингіде 67-сатыда тұрған америкалық Маккартни Кесслердің жеңгенімен шеберлік таластырады.
Егер Ю.Путинцева үшінші айналымға шыға қалған жағдайда әлемнің 1-ракеткасы, белорустік Арина Соболенкомен кездесіп қалуы ықтимал.
Өткен маусымда бұл жарыста Елена Рыбакина жеңімпаз атанған еді. Биыл ол Сидней мен Пертте өтіп жатқан United Cup турнирін таңдады.
Еске сала кетейік, бұдан бұрын теннистен United Cup турнирінде Қазақстан құрамасының Испанияны жеңгенін жазған болатынбыз.
Сондай-ақ Михаил Кукушкин Аустралиядағы жарысты жеңіспен бастады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).