АСТАНА. KAZINFORM — Қазақстандық теннисші Юлия Путинцева жұптық сында Цинциннати (АҚШ) WTA 1000 турнирінің ширек финалына өтті.
Қазақстандық теннисші канадалық Лейла Фернандеспен бірге екінші айналымда америкалықтар Кэролайн Доулхайд – Дезире Кравчикпен кортқа шығуы тиіс еді.
Әйтсе де америкалық жұп матчқа келмей қалды да, Путинцева –Фернандес ойнамастан ширек финалға жолдама алды.
Юлия Путинцева – Лейла Фернандес жартылай финалға шығу үшін жарыстың 1-ракеткалары, чехиялық Катерина Синякова – америкалық Тэйлор Таунсендпен таласады.
Ю.Путинцеваның жекелей сында испаниялық Паула Бадосамен ойыны да бүгінгі күнге белгіленген.
Тағы бір қазақстандық, әлемнің 121-ракеткасы, 36 жастағы Михаил Кукушкин Кэри (АҚШ) челленджер додасының жартылай финалына шыға алмады. Ол ширек финалда әлемнің 113-ракеткасы, италиялық Маттиа Белуччиға есе жіберді – 1:6, 3:6.
Еске сала кетейік, бұдан бұрын Цинциннати турнирінде сенсация жасап, Путинцеваның әлемнің 2-ракеткасын жеңгенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).