ОРАЛ. ҚазАқпарат - Қазақ қызы Зарина Дияс дүйсенбі күні жаңартылған әлемдік рейтингте 70-інші орынға көтерілді.
Мұның алдында 86-ыншы сатыда тұрған жиырма жасар Зарина осылайша әлемдегі үздік жетпіс теннисшінің қатарына қосылып отыр. Бұған өткен аптада Ноттингем турнирінде З.Диястың сәтті өнер көрсетуі мүмкіндік берді. Онда финалға дейін жеткен Зарина чехиялық Кристина Плисковадан ғана ұтылған болатын.
З.Дияс Қазақстанның бірінші ракеткасы саналатын Ярослава Шведованы өкшелеп келеді. Ол бір сатыға жоғарылап, 68-ші орынға шықты.
Сhampionat.com сайтынан алынған мәліметке қарағанда, Зарина Дияс 9-15 маусым аралығында Бирмингемде өтетін тағы бір турнирге қатысады. Онда алғашқы айналымда франциялық белгілі теннисші Виржини Раззаномен кортқа шығады.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).