АСТАНА. ҚазАқпарат - Майами қаласында (АҚШ) теннистен өтіп жатқан ірі халықаралық турнирде қазақстандық Зарина Дияс үшінші айналымда әлемнің бірінші ракеткасы, атақты америкалық Серена Уильямспен күш сынасты.
Сhampionat.com сайтының хабарлауынша, бұл тартысты бәсекеде Серена 7:5, 6:3 есебімен жеңіске жетті.
Бұл - қос теннисшінің екінші кездесуі. Өткен жылы Индиан-Уэллс турнирінде С.Уильямс 6:2, 6:0 есебімен ұтқан болатын. С.Уильямс Майамиде ширек финалға шығу үшін ресейлік теннисші Светлана Кузнецовамен шеберлік байқасады.
Заринаның жүлде қоры 6,1 млн доллардан асатын Майами жарысының үшінші айналымына дейін жетіп, әлем чемпионатымен тең саналатын «үлкен дулыға» турнирін 21 рет ұтып алған атышулы теннисшімен тайталасуын жақсы табыс деуге болады. 2015 жылы қазақстандық теннисші Майами турнирінің екінші айналымынан аса алмаған еді. Қазір дүниежүзілік көште 97-інші орында тұрған Зарина Диястың биылғы турнирден кейін рейтингісі жоғарылайтыны анық.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).