Заң жобасы: жекеменшік балабақша салуға жер беруге тыйым салынады

АСТАНА. KAZINFORM – Бүгін Мәжіліс отырысының бірінші оқылымында мектепке дейінгі білім беру, яғни балабақша мәселесіне қатысты заң жобасы қаралды.

- Заң жобасында мектепке дейінгі білім беруге екі маңызды норма қарастырылған. Біріншіден, балабақша құрылысына арналған жер учаскелерін егжей-тегжейлі жоспарлауда жер бөлу және оларды жеке меншікке беруге тыйым салу ұсынылады. Бұл шара балабақшаларға арналған жерлерді сақтап, мектепке дейінгі білім берудің қолжетімділігін қамтамасыз етуге бағытталған, - деді Мәжіліс депутаты Асхат Аймағамбетов заң жобасын таныстыра отырып.

Сондай-ақ заң жобасында 6 жасқа толған балаларды мектепке барғанша балабақшада қалдыру мәселесі қаралып отыр.

- Қазір ата-аналар жиі кездесетін мәселенің бірі – балаларының 6 жасқа толғаннан кейін, бірақ оқу жылы басталғанға дейін балабақшадан шығарылуы. Бұл өз кезегінде ата-аналар үшін үлкен қиындықтар тудырады, өйткені олар бала күтімін ұйымдастыру мәселесімен бетпе-бет келеді. Мысалы, егер бала жылдың басында, ақпан айының 5 күні 6 жасқа толса, оны кейбір балабақшалар дереу шығарып жібереді, бірақ ол баланы мектепке әлі бара алмайды. Осы норманы енгізу арқылы балалардың балабақшада жазға дейін қалуына мүмкіндік беріледі, - дейді ол.

Айта кетейік, бүгін Қазақстан Республикасының кейбір заңнамалық актілеріне мәдениет және білім беру мәселелері бойынша өзгерістер мен толықтырулар енгізу туралы» заң жобасы Мәжілістің бірінші оқылымында қаралып жатыр.

Аталған заң жобасында жарыстарда озат болған оқушылардың ұстаздарына бір реттік сыйақы беруді заңдастыру мәселесі қаралып жатыр. 

Сонымен қатар заң жобасы аясында кітапханаларда ақылы іс-шара өткізіп, табыс табуға рұқсат берілмек.