АСТАНА. KAZINFORM — Германияның Оффенбах қаласында жасөспірімдер арасында супер санаттағы ITF Juniors J500 турнирі өтіп жатыр.
ITF Juniors рейтингісінде 8-орында тұрған қазақстандық, 17 жастағы Заңғар Нұрланұлы аталмыш жарыстың 1-ракеткасы болып тіркелген.
Түркістан теннис мектебінің түлегі алғашқы айналымда жасөспірімдер рейтингісінде 149-орындағы аргентиналық Томас Ренің мысын басты.
Бірінші партияда Заңғар 6:4 есебімен басым түсті. Екінші сетте қарқын қосты — 6:2.
Заңғар Нұрланұлы екінші айналымда ITF Juniors рейтингісінде 267-сатыдағы чехиялық Якуб Шмейцкимен кездеседі.
Еске сала кетейік, бұдан бұрын Елена Рыбакинаның WTA чемпиондық кестесінде көш бастап келе жатқанын жазған едік.
Сондай-ақ Рим турнирінде қазақстандық теннисшілер өткен жылғы көрсеткіштерін жақсарта ала ма, бұл туралы хабарланды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).