АСТАНА. ҚазАқпарат - Жапония астанасы Токиода өтіп жатқан халықаралық турнирде қазақстандық Зарина Дияс әлемнің 28-інші ракеткасы, қытайлық Чжан Шуайды ұтты, деп хабарлайды «ҚазАқпарат» тілшісі.
Myscore.ru сайтынан алынған мәліметке қарағанда, дүниежүзілік рейтингте 100-інші орында тұрған Зарина Дияс 1 сағат 11 минутқа созылған матчта қарсыласын 6:4, 6:2 есебімен тізе бүктірді.
Бұл турнирде тағы бір қазақстандық, рейтингте 52-інші сатыда тұрған Юлия Путинцева екінші айналымда қытайлық, әлемнің 136-ыншы ракеткасы Хань Син-Юньмен күш сынасты. Бірінші партияда Ю.Путинцева 6:2 есебімен басым түсті. Екінші партияда есеп 2:0 болғаннан кейін қытайлық теннисші кездесуді жалғастырудан бас тартты.
Осылайша, ширек финалда қос қазақстандық теннисші Ю. Путинцева мен З. Дияс өзара шеберлік байқасатын болады.
Еске сала кетейік, Токио турнирінің жүлде қоры 226 750 АҚШ долларын құрайды.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).