09:40, 12 Қаңтар 2014

Зарина Дияс чехиялық теннисшімен кездеседі

ОРАЛ. 12 қаңтар. ҚазАқпарат - 13 қаңтар күні Мельбурн қаласында басталатын теннистен Австралияның ашық чемпионатында қазақ қызы Зарина Дияс алғаш рет додаға түскелі отыр.

Іріктеу сындарында үш бірдей қарсыласын ұтып, аталмыш біріншіліктің негізгі кезеңіне өз өмірінде бірінші рет өткен жиырма жастағы теннисші алғашқы айналымда чехиялық Катерина Синяковамен шеберлік байқасады. З.Дияс әлемдік рейтингте 163-орында тұрса, 18 жасар К.Синякова 172-сатыда жайғасқан. Ол да Зарина сияқты іріктеу сынының жеңімпазы атанған. Егер қандасымыз бірінші кездесуін сәтті аяқтаса, екінші айналымда румыниялық Сорана Кирстя немесе жаңазеландиялық Марина Эраковичпен кортқа шығады. Жүлде қоры 14,3 млн. АҚШ долларынан асатын, әлемдегі төрт «үлкен дулығаның» бірі болып саналатын Австралияның ашық чемпионатында Қазақстан намысын сондай-ақ қыздардан Ярослава Шведова, Галина Воскобоева, Юлия Путинцева қорғайды.

Спорт

Ғайсағали Сейтақ

1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).